謝曬皮粉絲注意！皮皮將搞怪精神帶到銅鑼灣地帶及東角Laforet，今個萬聖節首度化身護士喪屍及大搞素顏嚇鬼派對，聽個名都覺得性感。 插畫師謝曬皮首個個人聯乘企劃「銅鑼灣地帶 x 謝曬皮 玩轉HALLOWEEN」，首度展出1:1 3D 護士喪屍造型 (1.6米高) 之「你的靈界朋友嚇死人冇命賠謝曬皮」，大家只需坐上指定位置與血盤大口、心口走出鬼怪的謝曬皮合照，現場仲有感應燈效營造鬼怪氣氛。 同場更有謝曬皮筆下怪趣角色，包括電影《家有囍事》的周星馳「家陣老笠」造型、廣告紅人「保險細路」等，保證粉絲笑著撞鬼。 另邊廂東角 Laforet 將大搞「謝曬皮素顏嚇鬼派對」，聯同筆下港女角色「E Cup Cake Baby」、「Hea爆唔知扮乜就最好扮之貓女」及「薑絲小姐」等以素顏上陣於公眾場合敷面膜，畀粉絲一次合照！