忙完一周，大家周末好想去個小旅行，Kelly有一個節省交通時間又好玩嘅推介，首隻以香港同廣州南沙為雙母港嘅星夢郵輪「雲頂夢號」，喺下月十二號先蒞臨香港供港人參觀，十三號駛去廣州南沙首航，呢艘超級豪華郵輪，設備一應俱全，除左有澳洲星級名廚主理嘅美食，仲有首個海上Zouk派對俱樂部，啱晒唔同年齡層嘅朋友。郵輪公司仲推出「I LOVE HONG KONG」套票優惠，周五上船，周日上岸，吃喝玩樂，玩足三日，慳番交通時間，等如隨時上巨型遊艇咁好玩。 「雲頂夢號」剛喺德國船廠落水，係全新建造嘅超級豪華郵輪，可接載三千四百名旅客，由二千名船員服務打點一切，係現今船員與乘客比例近乎最高嘅郵輪，船上有攀石場、迷你高爾夫球場之外，特別設有Zouk派對俱樂部，國際級DJ會為乘客打造狂野派對，另外澳洲名廚Mark Best將會喺船上主理嘅現代西式餐廳「星廚」，炮製美食，吃喝玩樂，應有盡有！ 　　星夢郵輪總裁Thatcher Brown向小妹透露，為迎合港人鍾意喺周末外遊嘅需求，公司推出限定嘅「I LOVE HONG KONG」優惠，即日起至下個月十二號，持香港身份證嘅朋友，可以體驗價一千四百九十九蚊，預訂下月十八號至明年三月期間嘅周末「三日兩夜」行程，周五晚香港上船，暢遊周邊海域，享受船上設施，周日返港，啱晒想去旅行又唔想舟車勞頓嘅朋友！另外，「雲頂夢號」仲有好多唔同航線，覆蓋越南峴港、下龍灣等，真係諗起都想上船玩番餐。