港島南區呢排好旺場，除咗南港島線快將開通之外，紥根該區嘅海洋公園，到明年1月已開業40周年啦！當然會有一連串慶祝活動，頭炮就係送4,000張免費門票，大家只要參加「集體造回憶」攝影比賽，入去園區重遊舊地，重溫過去40年來與摯愛親朋共度嘅美好時光，影埋相，就有機會獲贈門票，優勝者更可贏取有效期長達10年嘅海洋公園智紛全年入場證優越卡4張。 參加方法好簡單，香港市民只要喺明日至本月29日期間，遞交一張於2011年或之前攝於該園區嘅舊照，連同一張今年喺園區內拍攝嘅近照，並附上簡短說明，咁就搞掂。咪話Ray唔提大家，呢4,000張門票除咗將以先到先得形式送贈予合資格嘅參加者外，獲贈嘅入場門票數目，亦將取決於所遞交嘅兩幅新舊照片中均有出現嘅人物總數。即係點？大家梗係快啲搵番張勁多朋友嘅大合照出嚟啦！ 至於點樣成為優勝者，就係海洋公園會將成功參賽嘅作品上載到網站https://40a.oceanpark.com.hk，由明日至本月31日期間接受投票，票數最多嘅就得獎，結果將於明年1月10日舉行的海洋公園40周年慶典及網站公布。 講明今次只係頭炮，公園話為期一年嘅慶祝活動，將於明年1月10日揭開序幕。