昂坪360纜車維修緊大纜，停駛中，約三、四個月後重開，適逢今年係360纜車十歲生日，當然要與眾同樂啦，據360好友講，將會優惠十歲小童，可享無限次免費乘搭標準車廂纜車之旅，等佢哋帶埋父母同行，一起慶生！ 昂坪360董事總經理關敏怡（Stella）好開心咁同Kelly講，今年係昂坪360十歲生日，所以推出特別「着數」益街坊咁話，其中一項優惠，係給二○○六年九月十八日至二○○七年九月十七日出生、今年十歲嘅小朋友，可以喺今年十二月三十一日前無限次免費乘搭標準車廂纜車之旅，而同行成人都會獲得折扣優惠㗎，既親親大自然又可以當親子活動都幾正喎。由於纜車換緊纜索，暫時停止服務，預計於六月初先恢復，所以小朋友記得一早約定大人，到時上昂坪玩餐飽。 　　唔講唔知，原本啲遊客都幾Like昂坪360喎，Stella話上年訪客數字達到一百七十多萬人次，比前年激增半成有多，當中嚟自菲律賓、印度同日本嘅旅客升幅最多，小妹諗唔知係咪呢三個地方嘅旅客特別唔怕高呢？另外，360南大嶼精華遊新團亦會重開，路線由東涌至梅窩，Stella透露個定價會參考市場其他同類旅遊商品喎！