半島酒店自助餐 65 折 激劈 $275！露台餐廳闔家同樂 去半島酒店食自助餐，唔駛問阿貴都知好貴！不過香港半島酒店露台餐廳即日起搞「露台餐廳：周六闔家同樂」優惠，自助午餐 65 折。以半島酒店周六日露台餐廳的自助午餐成人正價 $788 計，65 折即係減約 $275！ 不過，唔係人人都可以享受呢個 65 折優惠！每一位 65 歲以下客人，帶同最多兩位 65 歲以上長者惠顧露台餐廳自助午餐，長者才可享 65 折優惠。至於 65 歲以下成人，一樣要付正價；3 歲至 11 歲小童就可以 $578 享用自助午餐。雖然只限 65 歲長者才有 65 折，而且要有 65 歲以下成人陪同，但如果以一家大細有老有幼，一樣算係抵，ezone.hk 即刻同你計計： 假設：一家 5 口爸爸媽媽阿仔阿爺阿嫲去食自助午餐，阿仔係 3 歲至 11 歲內，而兩位長輩係 65 歲以上 正價：$788 x 4（4 位成人正價）+ $578（一位小童）= $3,730（另有加一服務費） 特價：$788 x 2（2 位成人正價）+ $512.2 x 2（兩位長者特價）+$578（一位小童）= $3,178.4（另有加一服務費） 如果以上述組合去半島酒店食自助午餐，合計都可以慳到五百幾蚊。但留意，優惠都有唔少限制，除只適用於露台餐廳周六日之自助午餐外，5 月 8 日母親節、6 月 19 日父親節都不適用；優惠期至 9 月 30 日。另外，每檯客人只可享優惠一次，不能與其他推廣或禮券一起使用；客人想享受優惠亦要出示其生日證明（不過無講明係身份證）。