香港地自助餐價錢愈來愈貴，晚餐價動輒四、五、六百，以為食下午茶自助餐可以慳啲？酒店級數的，基本上每位兩三百元無走雞。當收到東涌諾富特東薈城酒店Essence餐廳將由2月23日到6月9日期間推出周末「台式周末」下午茶自助餐，每位連加一埋單二百有找，真係有驚喜，所以要急急話畀大家知呢項著數。 今次自助餐以台灣美食為主題，提供超過50款食品，除了三文治、中西鹹甜茶點、各類即製麵食、薄餅、朱古力噴泉和雪糕等美食，焦點是多款台灣特色甜點及鹹食，包括鹽水雞、牛肉麵、藥燉排骨、蚵仔煎、黑糖珍珠梳芙厘班戟及愛玉仙草配等，加上台食經典─珍珠奶茶，以下午茶自助餐來講，食物選擇算咁上下，而且有台式美食撐場，叫做有點特色，唔係食來食去蛋糕、班戟、雪糕、窩夫，有啲新意。 價錢方面，逢星期六、日，每位$178；公眾假期每位$178。進餐時間是下午2時45至5時。惠顧滿$300，可享長達3小時的免費泊車，不過酒店泊位有限，如要享泊車優惠，訂枱時記住預約。