kongsolo jetso expired

海洋公園新春再推免費夜場

仲有唔夠一個月就係農曆新年,相信市民除咗拜年,都會出街行吓感受狗年氣氛。海洋公園喺大年初一至年初十期間推出免費夜場,每逢晚上7點至11點,市民都可以進入「海濱樂園廣場」、「香港老大街」等範圍,欣賞街頭表演,仲可以同財神爺拜年。不過,山下嘅亞洲動物天地園區及山上機動遊戲園區都唔會開放。 公園喺大年初一起仲會換上唔少配合狗年嘅擺設,包括有「可愛運財靈犬」,以及「巨型運財風車」。園方並首次推出新春市集,攤位販賣由年青人創作、具香港情懷嘅特色飾物、布藝產品及玻璃押花等,市民可以一邊行市集一邊食街頭小吃,亦可以參加攤位遊戲,有機會贏得旺財靈犬、財神爺等新春限定公仔。 園方仲喺新春期間邀請到台灣「九天民俗技藝團」表演,佢哋每日會上演6場鼓樂表演,亦有5場巡遊,傳統廟會神偶亦將以鼓舞出巡,沿途同遊人互動。 另外,海洋公園已經喺本月1日起加入場票價,成人及小童日間入場門票增至480元同240元。