kongsolo jetso expired

免費急救課程 逾萬小學生受惠

黛安一直都鼓勵身邊嘅人學急救,幫到自己又幫到人。黛安噚日出席香港聖約翰救護機構嘅飯局,機構理事會主席鍾展鴻話,計劃今年9月喺80間小學嘅小五同小六,推出為期16個鐘嘅免費基礎急救班,預計有1萬個學生受惠,暫時聯絡咗保良局同聖公會轄下嘅小學,如反應好就會將計劃擴展到中學。 黛安知道,每位上急救班嘅學生原本需要買練習用嘅急救用品,成本約200元,但依家參加計劃嘅學生就完全免費,只需要學校提供地方同時間上堂就得喇,真係好抵學! 另外,聖約翰嘅急救單車隊喺上個月新增30部車,機構理事會副主席潘新標話,等單車裝備好後,就可投入服務,到時就有逾50部急救單車為市民服務喇! 身兼聖約翰理事會義務秘書嘅兒科醫生李家仁,喺飯局尾聲仲送咗自己嘅新單曲《小明搭高鐵》畀黛安,仲話嚟緊有意製作一首叫《小明防詐騙》,提高市民自我保護意識,認真有心!