唔少上班族放工後，都會想行街、享受美食放鬆下。長江集團旗下屈臣氏嘅全新購物概念店CKC18，主打一站式購物體驗，喺面積逾26,000呎嘅長江中心地庫，集合咗美食、美粧及健康、電玩潮流，同埋美酒專區，恍如一個小型百貨公司，相信一定可滿足上班族需要。 CKC18噚日正式開幕，長江集團新任主席李澤鉅（Victor）都有現身撑場主持開幕。Victor話，一眾同事最高興，事關放工後可落嚟扮靚、飲酒。CKC18充滿新意，問到Victor有無份參與策劃，屈臣氏集團董事總經理黎啟明就話，Victor係負責提供材料，「佢畀個場我哋，一班同事就發揮創意，CKC18就係咁誕生。」 近年零售業都流行用移動支付，而CKC18亦於場內運用多項零售科技。黛安見場內所有產品都設有一個銀色嘅感應條碼，只要將貨物放入購物籃，然後將購物籃放喺無人付款台，就可立即得悉價錢，用電子付款。省卻逐件貨品「過機」嘅步驟，相當方便呀！ 喺CKC18購物，可以話係「沒有最快，只有更快」。事關客戶除咗親臨店內掃貨外，仲可用手機應用程式預購食物，收工後再去店內取貨，大大節省購物時間。 黎啟明仲話，現時電子商店競爭激烈，所以集團藉住糅合網購同實體購物體驗，期望脫穎而出。