夏日炎炎正好眠？但黛安就覺得最好係玩下水！迪士尼今個夏天將有好多新搞作，包括最啱一家大細玩嘅「Pixar水花大街派對！」，每日限定下晝4點半一場咋，記得帶定防水用品！ 因為除咗有《超人特攻隊》嘅超能先生、超能太太、冰條俠、《反轉腦朋友》嘅阿樂、《反斗奇兵》等多位人氣角色巡遊表演外，花車會沿途噴水，仲有30位迪士尼表演者用水槍向遊客大噴「水花」，幫你消消暑。 活動會去到9月2號咋，除咗水花大街派對，仲會有「動畫藝術教室」，有動畫師教畫萌爆積積、米奇等人物，每日教畫嘅角色同教學時間都唔同，有興趣嘅朋友要喺入場嗰陣留意告示牌或問下職員喇。 公關姊妹仲話，只要係香港居民，即日起至9月2日喺網上買票，成人小童各買一張票，即可盡玩兩日迪士尼嘅夏日活動，兩大一細仲可用1,488蚊，齊齊喺迪士尼過一個清涼夏日！ 而且，憑即日門票，自備或到商店買一枚徽章，仲可參加今日同8月24號嘅「2018徽章交換Fun享晚會」！