返工疲倦嘅時候歎杯精緻特飲，最啱為打工仔叉電。為咗慶祝二十周年，McCafé今年搞搞新意思，即日起推出勁受女仔歡迎嘅芝士奶蓋飲品，全面為港人享受升級。公關姊妹話，今次推出6款芝士奶蓋飲品都勁有特色，用上嚟自歐洲同新西蘭嘅芝士做「主角」，除咗配搭咖啡、抹茶口味，仲有芒果、雜莓水果茶同埋花茶，每杯都係$25起。叫多件$28起、全新推出嘅彩虹海綿蛋糕，用來打卡，保證「卡娃伊」。 噚日麥當勞姊妹專登帶咗呢六款新特飲同彩虹蛋糕上《晴報》探班，搞到成班同事起哄。黛安咁啱都有幸一齊試飲，最推介係「芝士奶蓋黑咖啡」，咖啡底用上McCafé House Blend Cocoa Tazza，配上充滿鹹香嘅芝士奶蓋，進一步提升咖啡香味，非常有層次，加上市面好少見到用黑啡配搭芝士奶蓋，真係要一試。 想Fresh啲，用上台灣四季春嘅「芝士奶蓋四季春」，茶味甘甜且有陣陣花香，配埋芝士奶蓋，味道更好。 姊妹仲話，最近「麥麥送」同順豐速運成為策略夥伴，以後McCafé飲品都可通過「麥麥送」外賣啦。位於希慎廣場嘅Pop-up Store，即日起至19日指定時段免費派指定口味芝士奶蓋飲品；用「麥麥送」單次消費滿$100，亦可免費有一杯芝士奶蓋特飲；麥當勞App都送出大杯裝芝士奶蓋特飲，總數有20萬杯，大家記得去開心叉電呀。