想同班尊貴馬會會員睇齊，入馬場睇馬同時歎住冷氣一邊食飯一邊投注，Easy Job！快活谷最新的半自助餐廳The Gallery月貝凡剛於上星期開業，只於星期三賽馬日才開放，每位$305便有一款西式主菜，而Tapas Bar內十多款冷熱頭盤及甜品更是無限量供應。六款主菜每季轉換，燒春雞伴香草麵糰及燴茄子配香草燒汁份量豐富又惹味、香腸及銀魚柳薄餅則啱晒同朋友Share。香草醃三文魚、迷迭香菠蘿蝦沙律、風乾火腿等前菜亦做得出色。 另一吸引點，是餐廳內二百多個座位均全無遮擋，面向馬場跑道，景觀極開揚，又可走出露台直擊賽事，感受氣氛。餐廳除了Free Wifi，更備有一百部iPad供食客查閱馬匹資料和賠率，又有特別設計的馬場潮語、模擬賽馬等遊戲。場內亦有投注Counter和自助投注機，配套勁齊全，感覺同樣咁尊貴。 The Gallery月貝凡 •地址：跑馬地馬場公眾看台三樓 •電話：3690 3690 •營業時間：7pm-11pm（逢周三晚跑馬地賽馬日） •收費：半自助餐$305起 •備註： 1. 9pm後Tapas Bar及甜品任食，不包括飲品，收費$190/位，不設訂位。 2. 收現金及信用卡，不設加一。 3. 單點飲品設加一。 4. 所有入場人士須年滿18歲。